Übergepäck

Auso: mir hei ä wunderbare Wuchäändtrip nach London buechet, mit SkyWork vo Bern ufe London City Airport i nume 1 h 35, zudäm äs schöns Hotel direkt am Marble Arch (dr Iigang zur Oxford Street, Shopping Strass) und mit viu Gäut im Gepäck zum usgäh. Da aber d Skywork wott maximal 20kg Gepäck la ufgäh und verlangt für Übergepick 12.- SFr. pro kg... Aso heimer üs scho bim packe dä heime iigschränkt und würklech nume z nötigschte mitgno.. (I ha gloub z erschtmau i mim Läbä aui Chleider o annegha, woni iipackt ha)
Tja, da heimer üs natürlech scho chli Sorge gmacht, öbmer das chöi iihaute.. Aber das het üs nid vom Shoppe abghalte! :D I mues no erwähne, das dr Wächsukurs fürs Englische Pfund 1.40 SFr. isch und nümme 2.50 SFr. Und jede Lade het massiv Summerusverchouf gha, so 30-50%... ;D LOS!!!

So isches auso nach viune sehr coole Tage in London wider ums iipacke gange.. De hani mau aues näbä Koffer gleit, när iigruumt.. Haut, dr Huet mues ja no ine.. ok, Platz gmacht, dr ander Huet ufe Chopf, wider iigruumt.. Haut, da si ja no d Blusli.. Ok, eis aagleit, z andere Iipackt... Haut, da hets ja no paar Schue, wo inemüesse.. die ono iipackt und wider rundume iigrumt.. Alles drin!! Finally!! ABER: wie bringi jetz dä scheiss Koffer zue?!? ok, das geit nid.. Zigipäckli lose i paar Spalte wos no chli Platz het verteilt. Är geit zue! Juhu!

Ok, das isch ja noni z Ändi vo de Luxusproblem: Bi üsere U-Bahnstation heisi d Rollträppä abwärts umboue: somit heissts, dä Koffer über 100 Stuefe säuber abeschleppe.. nenei, mir gö uf die nächschti Station.. ok.. alles füregloffe (man bemerke, ar Oxfordstreet isch um 17.00 eifach Rush Hour und wird o umboue und somit unbezwingbar, drum simer eher hingerdüre..). Nachere ewig lange Fahrt ir vollgstopfte, 50°C heisse U-Bahn bis zum Zug simer u froh gsi, das mer üs nid us de Ouge verlohre hei.. Aber z beschte chunnt no: für ufe Zug zum LCAirport simer düre ganz verfluecht Bahnhof und natürlech 5 Stägä düruf und dürab mit so viu Lüt, dases längi Wartezyte vor und uf de Stägä het gäh.. Bachnass und gstresst simer de doch no im Zug abghocket, später gmüetlech am LCAirport usgstige und ändlech dä Koffer abgäh!!! UND: 17 kg!! Super Sach! Ab nach Hause... ^^

Packe

Auso, da mir morn abflüge bini natürlech jetz am packe.. Säubverständlech ohni Packlischte, brucht die Frau von heute ja nid... =P Natürlech isch mit mire Reisepartnerin alles abgsproche, wär dr Föhn, Abschminki, Shampoo, Medikament etc. mitnimmt. Das hani mer scho chönne merke.. =)             (wärde mer de eh ersch z London merke^^)

Ok, da sitzi jetz, zmitts i mine Sache, nime öpis füre, wo mer grad iifallt, merke när: aha! das hani no im chliformat! XD ok, näme mer z chline mit.. schliesslech weimer mit lääre Koffer gah und mir volle wider zrügg cho.. hehehe
Z Handgepäck isch am Bode verteilt: was Flüssigkeite müesse ine 1 Liter grosse, durchsichtige, widerverschliessbare Plastigsack?! Süsch no Wünsch? De blibts haut ir Schwiiz.. =P Äs isch nümme wie früecher.. Gott sei Dank! süsch hätte usgrächnet mir öppe no sone Terrorfritz ufem Flugi..

Aber zumene viu wichtigere Problem: Handtäsche! Hilfe liebi Froue und Manne!! I ha 3 verschideni Grösse a Handtäschli füregno:

1. z ganz chline, dert möge knapp Zigis und z Telefon ine, fürs Füürzüg längts de scho nümme.. aber si isch mega stylisch, het kei Hänku und isch schön hert, so das ä ufdringleche Ma sicher am nächschte Tag ono Chopfweh hätti..

2. z mittlere, dert mag scho chli meh dri, aso z Portemonnaie (und mis isch gross!) mögti guet dri plus no paar angeri Sache.. Aber fürnes Handgepäck-Täschli isch si de grad z chli und z schön.. =/ hmmm

3. z gröschte, dert mögti scho ä haubi Bibliothek dri.. Si wäri aber zum Shoppe i de Strasse durchus geignet, da si 2 Hänkelsystem het, me chönnt alles drinne verstoue und het d Häng frei zum Fötele oder Rouche.. hmmm

4. und das chunnt garantiert mit: z schmale Buchtäschli chunnt id Hose mit de Reiseungerlage, Traveller Checks, Kohle und Pass.. I merkes ämu de, wemer öper a de Hose umefummlet.. ;-)

OK, jetz sit dir gfragt! Bitte schnäu antworte, da mer ja am 17.30 scho zum Abflug bereit stöh..!
Weli Täschlikombination het öich überzügt? Oder würdeter grad aui mitnäh? immerhin hets im Koffer jetz no Platz... Oder villech findi ja in London äs cools...

PS: vo de Schue fani gar nid ersch a... ;-) Sorry Sheila!

Glatze

Ir letschte zyt gsehni ussergwöhnlech viu manne mit glatze und i mues einisch sägä, das mir das gfaut! so "oben ohne" findi ganz sexy! me cha schliesslech nüt drfür, we eim d Haar imene gwüsse auter afö liechter wärde.

I finges viu schlimmer, weme sech Schamhaar verpflanzt oder d Haar obe laht la wachse und uf die anderi Site übere strählt! *kotz* Liebi Manne! Bitte machet das nid! me gsehts immer ufe erscht Blick und äs gseht o würklech nid guet us! I wett nech ganz fescht as härz lege: traget öiche chopf mit Style und schnidet ä Glatze! äs steit nech i jedem fau besser!

Und wär sech überne volli Haarpracht cha fröie het ou d Chance, sech mau ä schöne Gledu z rasiere! ^^ vorauem im summer isches gloub gäbig!

Liebi Manne!

Mir isch bim Salsa tanze ufgfaue, dases immer ä Ungerbsetzig a Männer git.. Wieso nume? Heiter angscht öich z blamiere? Chöiter mitem Körper nid so umgah fürs tanze? Chöiter ä Frou nid führe? Und wieso si dert so viu Päärli gsi? Tue de d Manne nume tanze, we se d Froue mitschleppe? Das chas ja o nid si, oder?

Liebi Manne!
Weme si Körper cha bewege, denn zeiget das de Froue! Blamiere tuet me sech meischtens nid, da me i üsne Breitegrad eh nid die Konkurenz het, wie im Süde.
Ä Frou chönne führe isch schwirig, das gibi offe zue. Aber wenn ä Frou freiwillig das macht, wo dir weit, isches doch super, oder? Usserdäm chöiter ihre ganz nöch cho, se aalänge ohni das si nech eis hout und mau schnuppere, öb si nech passt. Me schwitzt und macht Bewegige mit dr Hüft, wo dr süsch nur i dr Horizontale machet und so chöiter o grad gschpüre, ob si beweglech isch.. ;-)

Vorteile über Vorteile!! I wett das eifach mau i Ruum steue und hoffe, das sech meh drzue löh la verleite, mau ä Salsa Kurs z mache..


JA! Genau DU! Ufstah vom PC und ab i Kurs!

I mues grad spontan öpis loswerde: aui die, wo ä ganze Arbeitstag hingerem PC verbringe, RESPEKT! I ha Chrüzschmerze, ä verspannte Nacke und z Gsäss tuet mer weh... meine Güte! Zum glück chani gli wider uf dr Abteilig go schaffe, so dasme z Sitze wider richtig cha schätze!!

Auso, i mäude mi ab.... *TILT*  o.0


Aber no öpis ufem Wäg für ga z schlafe:
Yesterday is history, tomorrow a mistery, but today is a gift.
That's why it is called present.

Verruckti Sach

Aso, i fah gärn aube mitem Ändi vore Gschicht a, das so meh Spannig entsteit. =)
Dä hütig Abe het dermit gändet, dasi im Pijama heigfahre und zum Hus gloffe bi...

... dr Afang isch chli harmloser, i bi mitere Kollegin* go Salsa tanze, soweit so gut, dr Abe het agfange wiener het ufghört: NASS! Sie isch grad unger dr Duschi fürecho und isch chli überrascht gsi, dasi scho da bi.. De heimer üs zwäggmacht und irgendwie alles i de Jeans verstout, womer bruche. De heimer üs ufe Velosattel gschwunge und si richtig Zentrum gfahre. Acho, gschwätzt, tanzt und öppis trunke. Plötzlech hets grusig afa Gwittere und Schiffe wie usere übervolle Giesschanne.. De heimer gfunge, mir gö inere Gwitterpouse richtig dä Heime und si doch tatsächlech i sone grandiose Gwitteraafau inecho! JUHU!!! Alles NASS! Ig bi haub am Iphone am schütze und z Velo stüre, am joole und warme Rägä gniesse.. I bi allerdings wortwörtlech i de Schue gschwumme! =D

När isches drum gange: Chleider sicher wäg, wüu, si si ja sehr nass, aber was legeni nume fürs heifahre a? Aaah! I ha ja mis Overnight-Kit im Outo! Das heisst: Tüechli, Pijama, Turnschue, Ungerhose und das Züg fürs Badzimmer! Alles klar! Pijama agleit, Jäggli drüber, Turnschue und ab nach Hause! Ha ömu warm gha! ;-)

*wider mau wird us Personeschutzgründ d Identität verschleieret. =)

Püppchen

I ha hüt ane ganz luschitigi Situation müesse dänke, wo vor ä paar Wuche bir Sändle passiert isch... ^^ i ha mi zrügg erinneret, wüui ä usschnitt usemne Fium gseh ha, wo mit luschitge aute Mannli het ztüe gha..

Auso: I bi bir Sändle dä heime gsi und mir hei üs im Garte mit irne 3 wundervolle Meitli spilt. D Sändle het mir grad ihres nöie Bäbi zeigt, wosi füre Tragtuechkurs kouft het. Das Püppchen het so erstuunlech ächt usgseh, dases fasch unheimlech isch gsi. När simer mit de Meiteli go Velo fahre und chli witer Strassabwärts cho. De isch grad ä ältere Mah us sim Huus usecho und het mit üs afa schwätze. De hani wie gewohnt z Bäbi im Buch-Bei-Griff ufem Ungerarm gha, wüus doch no rächt schwär isch gsi... Ds aute Mannli het de plötzlech mit "mim Baby" afa schwätze und öppe nümme so guet gseh, usserdäm öppe o nümme guet ghört, so daser nid mitbecho het, wieni sägä, äs sigi äs Bäbi.. Sis "Gutschigutschigu" isch haut nid bim Baby acho, und i hane de im Gloube gla, dases läbig isch...

Im Nachhinein hani mer dänkt, i hättems söue ufd Arme gäh und luege, waser drmit macht.
...guet, är het so aut usgseh, das sis Härz dä Schreck öppe nid vertreit hätti... isch gschider hanis nid gmacht... =D

Die Katze

I wett öpis zur Daniela Katzenberger loswerde: Äs isch auso schono ä spezielli Frou, rein vom Wäsä här und natürlech o üsserlech. Aber mini liebi Dame: Ougebraue zeichnet me sech nid ir Mitti vor Stirne!! Hei nomau, wär geit sech d Braue sooo wit obe la tättowiere, das me usgseht, aus wär me aahautend überrascht??
Hihihi, die Frou söttsch lieber nid erschrecke, süsch het si d Ougebraue im Äckä... XD
Das Malheur het si de wöue la wägmache und de heisi ihre aagrate, die falsch vorhandene Braue mit ihrere Hutfarb la drübertättowiere... Was bitte passiert de, wenn si mau chli brüner oder bleicher wird?? MUAHAHA, mach dr ä bildli!
Abschliessend: du bisch ä verruckti Nudle! Mach lieber cooli Tattoos a anderne Orte und la unfähigi Tättowierer nümme id Nöchi vo dim Gsicht! =D

Komischi Situation

Mau Grundsätzlech geits drum, das hüt ä Ma zure Frou isch iizoge. Mä chönnt jetz dänke: ja super, passiert doch no hüüfig, wieso isch das jetz spannend? Aber nume abwarte und wiiterläsä, äs wird nech gfaue... ;-)

...für Klarheit z schaffe muesi no mit dr Vorgschicht afa: wo dr Ma no jünger isch gsi, heter langsam ä Beziehig zu dere Frou ufboue, äs paar Dates gha und sich meh oder weniger guet verstande. Äs isch nid lang gange, bis si zämä Sex hei gha und äs het de tatsächlech ä Schwangerschaft usglöst. Tadah! Da heimer se, ä glücklechi Familie usem Biuderbuech, wo die nächschti Generation isch ufd Wäut cho. Aber einisch het d Frou gnueg gha, wüu är regelmässig frömd gange isch... Das het si sech nid la gfalle und är het nümme is Huus dörfe. Zu all däm heter nur ä ganz chlini Wohnig übercho... Denn heter ä paar nöii Froue gfunge, wone hei ufgno, är het ä nöie Name aagnoh und isch fürs erschte Versorgt gsi. Ä paar Jahr später heter doch dür zuefau die besagti Frou wider troffe und isch bi ihre hüt iizoge... Natürlech hets hurti klepft und ä riise Strit isch d Folg gsi. Ä schlächte Start chönnt me meine, aber was nid isch cha no wärde...

I sägä nume: Welcome back Siggi! Oh pardon, Caramel... I finds u schön, chunnsch du mim liebe Schnüsi Möisi cho Gsellschaft leischte, da i mi mit ihre chli schlächt cha ungerhaute... Und aller Anfang isch schwär, aber si brucht di meh aus ig si!!

Tröim

Wider einisch bini usemne Troum ufgwachet weis no haargenau, wasi tröimt ha.. egal wo der sitzed, chömet schnäu mit uf die wunderbari Reis...

...... dr Moment, wo me tröimt, faht ganz überraschend a, mä isch plötzlech irgendwo, me weis nid, wie me dert isch glandet. Umeluege hiuft da recht guet, so gseht me die Lüt, wo drbi si, mängisch kennt me se, mängisch nid, das spiut aber kei Rolle, das isch niemer angers aus ig säuber.
Schwirig wirds, weme öppis wett beiiflusse, aber es klappt nid: dä riisig Grizzli-Bär hätt sech nach mim Gring chönne Trolle, het sech aber usgrächnet i mini Richtig bewegt... Wie chönnts o angers si... *schüttel* plötzlech isch de no d Wand vor schützende Hütte wäg gsi, kei Ahnig wohere.. Tja, da stahni,probiere z flüchte, ghöre und gseh dr Bär nümme, isch aber sicher grad ä Meter hinger dranne....... SCHRECK LASS NACH!........... und wach simer... guete Morge!

... mittlerwile weisi, das weni vo grosse, "böse" Tier tröime, wo uf mi unufhaltsam zuestüüre, hani öppis nid erlediget: ja lueg ou da, ä Brief vo de Stüüre, woni sött uftue.. hehe, nächscht mau tueni villech das Gschmöis grad uf, de chani mer so Wecktröim spare... =D

Tagespinguin

Das stimmt mi grad nachdänklech und bringt mi zum lache...

Post- Rock & Ride

Um das Fescht aaständig la uszklinge gits nüt bessers aus die letschti Nacht grad düre z mache. Das isch aber bi dene Temperature nid so eifach dürezhaute... ca. 5 Grad, gfühlt aber nume 1 Grad Celsius isch definitiv ä Muetprob! Zu däm chöme no haubwarmi Holdrios, grotteschlächti Karaokesänger, wo 3 Mau in Folg z Lied Auperose is Mikro päägä, üsserscht müehsami Gsellschaft vo de bereits müffelnde Dorfhobbyalkoholiker mit ä paar Proschpäckter drunger, wo suber und fiin zupfti Ougebraue hei... Zum das ganze abrunde gits bim Inge no paar chüeli Bier und früschi Gipfeli...mmmhm.....      
Aber dank dr Chrigä undem Albin isches doch ganz amüsant und churzwilig gsi!

Wo de aune voraa die ganz Aute und die Jüngschte aus erschts si ufgwachet, isch langsam wider Läbä ufem Platz iikehrt und de o wider langsam warm worde...

Chli später am Vormittag het d TNT* sech zuemer gsetzt und mi chli ungerhaute, zum sicherstelle, dasi nid vorem Abe iischlafe. Wo de dr eint sech eigentlech het wöue erliechtere, chunnter getaner Dinge mitemne nöie Töffheum zrügg. Mit Erstuune heter feschtgstellt, das si Chopf "nume" d Grössi XS het, womer o dr Grund drfür usegfunge hei, wieso das zuwenig Hirn am Töff steit..  :-*  i weis, dir nähmets mer nid übel! *wimpernklimper*

So, i mues mi jetz vo de Strapaze erhole und no villech ä paar stund nacheschlafe.. Guets Nächtle und DANKE!

*d Identität wird hie mitere Burka im Aldi verschleieret..

Peri-Rock & Ride

Die Jungs hei geschter angers grockt! Hie ä chlini Hörprob!

D CD hani säubschtverständlech ono mit de Ungerschrifte druffe erstande, so ghört sechs o fürne richtige Groupie! =D